Lisensya ng driver na sangkot sa NAIA accident sinuspinde ng LTO

PHOTO: Screengrab from Facebook/Raoul Esperas, DWIZ

SA loob ng 90 days, suspendido ang driver’s license ng sangkot sa naging insidente sa Ninoy Aquino International Airport (NAIA) Terminal 1 noong Linggo, May 4.

Ayon sa  Land Transportation Office (LTO), ito ay habang isinasagawa ang imbestigasyon sa nangyari.

Bukod diyan, naglabas din ng show cause order (SCO) ang ahensya laban sa nakarehistrong may-ari ng sasakyan at sa mismong driver.

“First, I would like to extend my deepest sympathies to the family of the two persons who died as a result of this unfortunate accident,” pahayag ni LTO chief Assistant Secretary Vigor Mendoza II.

Baka Bet Mo: DOTr maghihigpit na sa mga terminal, bus dahil sa ‘shooting incident’ sa Nueva Ecija

Sinabi ni Mendoza na isa sa mga namatay ay anak ng isang overseas Filipino worker (OFW).

“We already issued an SCO asking both the registered owner and the driver to appear before our office and explain the incident as part of our investigation,” dagdag niya.

Dakong alas-8 ng umaga, sumalpok ang isang itim na Ford Everest sa west departure curbside area ng NAIA Terminal 1.

Dalawa ang nasawi –isang adult na lalaki at isang apat na taong gulang na bata, habang may ilang iba pa ang nasugatan.

Batay sa initial report ng LTO, paalis na ang driver sa departure area matapos ihatid ang isang pasahero nang biglang may sedan na dumaan sa kanyang harapan.

Dahil dito, umano’y nataranta ang driver at sa halip na preno ang apakan ay aksidenteng inapakan ang silinyador.

Sa ngayon, nasa kustodiya na ng Philippine National Police (PNP) ang driver.