Miss Grand International 2021 Tien Thuc Thuy Nguyen arestado dahil sa gummies

Tien Thuc Thuy Nguyen

ARESTADO si Miss Grand International 2021 Tien Thuc Thuy Nguyen matapos ireklamo ng consumer fraud dahil sa ineendorso niyang gummies.

Hinuli ng Vietnamese police ang beauty queen nitong Lunes, May 19, dahil sa umano’y panloloko sa mga customer dahil sa pino-promote nitong Kera Supergreens Gummies, isang fiber supplement.

Sa mga hindi pa awate, si Tien ang nakalaban ng bet ng Pilipinas sa Miss Grand International 2021 na si Samantha Panlilio.

Nadiskubre ng otoridad na may 30% share si Tien sa naturang supplement business, na pag-aari ng iba’t ibang negosyante at investors.

Sa report ng VN Express International, sinabi umano ng Ministry of Public Security ng Vietnam na under investigation ang 26-anyos na beauty queen dahil sa mga akusasyon ng consumers.

Base pa sa ulat, noong December, 2024,  pinromote ni Tien, at ng mga influencer na sina Pham Quang Linh at Nguyen Thi Thai Hang, ang naturang gummies.

Ibinandera pa raw ni Tien sa kanyang Facebook page na ang kanilang gummies ay masustansiyang snack para sa lahat ng edad. Inilarawan pa niya itong, “equivalent of one plate of vegetables per gummy.”

Sumabog ang kontrobersiya sa Vietnam matapos magbigay ang isang customer ng sample ng produkto para sa tinawag na “independent testing at Quality Assurance and Testing Center 2.”

Ayon sa resulta, ang isang box ng gummy ay may lamang na 0.51 grams ng fiber, malayo sa ibinabandera nina Tien sa publiko.

Matapos bumuhos ang reklamo, binura ni Tien ang lahat ng promo materials sa kanyang social media pages. Pero huli na ang lahat dahil nagsagawa nga agad ng imbestigasyon ang Ho Chi Minh City Food Safety Management Authority sa kahilingan na rin ng Ministry of Health’s Food Safety Department.

Base sa lumabas na mga test, tumugma naman ang sugar, protein, fat, at energy level ng gummies sa nakarehistrong deklarasyon para sa produkto.

Pero ang naging isyu, nadiskubre raw na ang fiber content ng produkto ay hindi nailagay sa packaging nito gayung isa nga itong fiber supplement. Dahil dito, idineklarang “counterfeit” ang product. Substandard din umano ang ginamit na powder para sa fiber content.

Ipinatawag ng otoridad sina Tien para magpaliwanag sa resulta ng imbestigasyon at dito nga sila umamin na nagkaroon nga ng “false or misleading statements.”

Pinagmulta si Tien ng VND25 million o mahigit P53,000 habang sina Linh at Hang ay pinagmulta ng VND140 million bawat isa para sa “deceptive advertising” o katumbas ng kulang-kulang P300,000.