Comelec muling nagpaalala sa oras ng botohan para sa PWD, senior, buntis

PINAALALAHANAN muli ng  Commission on Elections (Comelec) ang publiko tungkol sa oras ng botohan bukas, May 12, 2025, para sa midterm elections.

Partikular na tinukoy ng Comelec ang mga espesyal na oras ng pagboto para sa mga senior citizen, persons with disability (PWD), at buntis.

Magbubukas ang mga polling precinct ng 5 a.m. para sa Early Voting Hours na eksklusibo para sa mga nakatatanda, PWD at buntis.

Magtatagal ito hanggang 7 a.m. pero paglilinaw ng Comelec, maaari pa rin namang bumoto ang mga nabanggit na sektor hanggang 7 p.m..

Para naman sa regular na botohan, magbubukas ang polling centers mula 7 a.m. hanggang 7 p.m. para sa lahat ng botante.

Matatagpuan din sa bawat presinto ang mga Express Lane para sa mga bobotong senior citizen, PWD, Indigenous People (IP) at buntis.

Bukod dito, siniguro rin ng Comelec na may mga Priority Polling Place sa ground floor ng mga polling precinct para hindi na mahirapan ang mga nakatatanda,  PWD at buntis. Meron ding mga Satellite-Priority Polling Place sa mga Assisted Living Facility.

Isasagawa maman ang botohan sa loob mismo ng mga detention centers para sa sa mga PDL o People Deprived of Liberty.

Ayon kay Comelec Chairman George Erwin Garcia, “Kapag ginusto ng mga nakatatanda o may kapansanan na hindi sila bumoto sa 2nd floor or 3rd floor ng isang building dahil nandu’n ang kanilang regular na presinto, mayroon po kaming priority polling place na nandu’n lang po lahat sa ground floor.”

Ayon pa kay Garcia, may 12 million registered senior citizen voters at 600,000 mula sa PWD sector ngayong eleksyon.

Paalala pa ng COMELEC, gamitin ang Precinct Finder upang malaman ang eksaktong lugar ng inyong botohan sa precinctfinder.comelec.gov.ph.