BINI, iba pang Pinoy achievers pasok sa Forbes ‘30 Under 30 Asia’

PHOTO: Facebook/BINI_ph

MASAYANG-MASAYA ang P-Pop fans dahil pasok ang nation’s pop group na BINI sa prestihiyosong “30 Under 30 Asia” list ng Forbes magazine ngayong 2025!

Ang girl group na binubuo nina Gwen Apuli, Aiah Arceta, Sheena Catacutan, Mikha Lim, Maloi Ricalde, Jhoanna Robles, Stacey Sevilleja, at Colet Vergara ay kinilala sa kategoryang Music & Entertainment dahil sa kanilang “unstoppable rise” sa industriya. 

Pero hindi lang sila ang bida, bumabandera din ang iba pang kabataang Pinoy na kasama sa listahan.

Kabilang na si Renren Galeno, isang Davao-based illustrator na tumatak sa international stage bilang isa sa mga nasa likod ng Pulitzer Prize finalist na “Searching for Maura” na lumabas sa Washington Post. 

Baka Bet Mo: BINI Sheena ‘di lang P-pop artist, babandera na rin sa aktingan sa ‘MMK’

Graduate siya ng UP Diliman at magna cum laude pa! 

Ang kanyang gawa ay tumatalakay sa kasaysayan ng mga Pilipinong inalipusta sa 1904 World’s Fair sa St. Louis.

Next up, ang boss lady na si Ysabel Chua na ngayon ay vice president ng Singapore-based venture capital firm na Forge Ventures. 

Dati siyang associate lang, pero ngayon, she’s handling five major investments.

Syempre, hindi rin pahuhuli ang batang chess genius na si Daniel Quizon. 

Sa edad 20, siya ang pinakabagong Grandmaster ng Pilipinas matapos talunin ang 64-year-old na si Igor Efimov sa 45th FIDE Chess Olympiad sa Hungary. 

At take note mga ka-BANDERA, national chess champ na siya simula 2021!

Present din sa listahan si Raya Buensuceso, ang managing director ng Kaya Founders. 

Siya ang nasa likod ng maraming startup investments sa bansa at sa buong Southeast Asia. 

At syempre, hats off din tayo kay Anna Beatriz Suavengco, isang agriculture graduate na gumagawa ng ingay sa Social Impact category. 

Siya ang nasa likod ng “Urban Farmer” TV series na nagtuturo kung paano magtanim ng sariling gulay gamit ang hydroponics.